ინტერს გი: საბურთალოში იდეალური ატმოსფეროა


მოქმედი ჩემპიონის ახალი ლეგიონერის პირველი ინტერვიუ

ინტერს გი ქართული ფეხბურთის გულშემატკივარმა სამტრედიადან გაიცნო. 2018 წლის ეროვნული ლიგის სეზონი მან სწორედ გარდამავალი ჩემპიონატის გამარჯვებულის რიგებში გაატარა, მიმდინარე თვეში კი საბურთალოს შეუერთდა.

26 წლის კოტ'დიუარელმა ნახევარმცველმა, რომელმაც ამხანაგურ მატჩში ნაპრედაკის წინააღმდეგ თავი უკვე გამოიჩინა, მოქმედი ჩემპიონის ოფიციალურ ვებ-გვერდთან ინტერვიუში ახალი კლუბის, ქალაქის, ქვეყნისა და სხვა საინტერესო დეტალების შესახებ ისაუბრა.

როგორ შეეწყვეთ საბურთალოს?

საბურთალო კარგი კლუბი, რომ იყო – ვიცოდი. საქართველოში გარკვეული პერიოდი ვცხოვრობდი და მეტ-ნაკლებად ქართულ კლუბებზე მაქვს წარმოდგენა. გუნდში იდეალური ატმოსფერო დამხვდა, ნამდვილად ყველა თავის საქმის პროფესიონალია. დაახლოებით ორი კვირაა, რაც კლუბში ვირიცხები და ისეთი შეგრძნება მაქვს, თითქოს ორი წელია საბურთალოში ვთამაშობ.

საბურთალო ტექნიკური ფეხბურთის მიმდევარია. ვარჯიშებთან შეგუება ხომ არ გაგიჭირდათ?

საბურთალო გემოვნებიან ფეხბურთს თამაშობს. სწორედ, ეს ის სათამაშო სტილია, რომელიც მიყვარს.

ფეხბურთს უხდება სანახაობრივი თამაში – ლამაზი კომბინაციები, სწრაფი შეტევა, გატანილი ბურთები.

რამდენიმე კლუბში გითამაშიათ. რას გამოარჩევდით საბურთალოში?

საბურთალო პროგრესირებადი და ამბიციური კლუბია. გუნდი ყოველწლიურად წინ მიიწევს. ეს შედეგი უბრალოდ არ მოდის. ჩანს, რომ სწორად მუშაობენ, როგორც კლუბის ხელმძღვანელები, ასევე მწვრთნელები.

რა იცოდით საბურთალოს შესახებ?

ვიცოდი, რომ კლუბს ჰყავს აკადემია, იქიდან საუკეთესო და წარმატებული ფეხბურთელები კი თამაშობენ დუბლებში, შემდეგ კი მთავარ გუნდში.

საბურთალოში სადებიუტო გოლს როგორ გაიხსენებთ?

მართალია, ამხანაგური მატჩი იყო, მაგრამ გოლის გატანა ყოველთვის სასიამოვნოა. თუმცა, ეს თანაგუნდელების დახმარებით მოხდა – ჩემამდე ბურთი რამდენიმესვლიანი კომბინაციის შემდეგ მოვიდა, მე საბოლოო დარტყმა შევასრულე და ისე გავიტანე. იმედი მაქვს, საბურთალოს მაისურით კიდევ ბევრ ბურთს გავიტან.

თურქეთში შეკრებაზე საბურთალომ ორი ამხანაგური მატჩი გამართა. რას იტყვით ჩატარებულ შეხვედრებზე?

რუმინეთის ვიტორულთან მატჩი უფრო რთული იყო, ვიდრე სერბეთის ნაპრედაკთან. მეორე შეხვედრაში ყველა კომპონენტში დავჯაბნეთ მეტოქე. ორივე სპარინგ-მატჩი აგრესიული გამოვიდა. სწორედ, ასეთ ფეხბურთს თამაშობენ ევროპაში.

რას გეგმავთ საბურთალოსთან ერთად?

მინდა, რაც შეიძლება ბევრი ტიტული მოვიგო – სუპერთასი, ქვეყნის თასი, ჩემპიონობა. იმედი მაქვს, ჩემი თამაშით დავეხმარები გუნდს მიზნების მიღწევაში, როგორც საქართველოს ჩემპიონატში, ასევე ევროტურნირებზე.

ეროვნულ ჩემპიონატში ერთი წლის წინაც თამაშობდით. რა მოგწონთ საქართველოში?

თბილისი ლამაზი და კარგი ქალაქია, ძალიან მომწონს აქაური გარემო – პატარა ქუჩები, ისტორიული ადგილები. თბილისი ჩემთვის უცხო არაა. მიხარია, რომ საქართველოში დავბრუნდი. ამ პერიოდში ძალიან შემიყვარდა ლობიო, ხაჭაპური და ხინკალი, მაგრამ იქიდან გამომდინარე, რომ მუდმივად სპორტულ ფორმაში უნდა ვიყო, ნაკლებად ვაგემოვნებ ხაჭაპურსა და ხინკალს.


 წყარო: Fcsaburtalo.ge