ჟოზეს ცეცხლი

აქ საინტერესო სხვა  არის: რამდენ ხანს დარჩება მოურინიუ ოლდ ტრაფორდზე.

მედია-შეტევა  ჟოზე მოურინიუზე თითქოს ჩაცხრა, რადგან მანჩესტერმა მშრალად მოიგო გასვლითი თამაში ბარნლიში და ლაპარაკიც იმის  თაობაზე, რომ  პორტუგალიელს  ეს  ერთი თამაში ჰქონდა დარჩენილი თავის გადასარჩენად, მიჩუმდა. სხვანარად  გააგდებდნენო. 

ინგლისში ხშირია  ასეთი რამეები, დაუნდობელი  მედია-დაწოლა, რომელსაც,  ცხადია შედეგები და  შიდასაკლუბო დაწოლაც უდევს საფუძვლად, როცა  უფროსობა მწვრთნელს  გასაგდებად ამზადებს. ეს საჯაროდ არავის გაუგონია ხოლმე, რომ, აი, ორი თამაში მოგვიციაო,  მაგრამ იმავე მედიაში ხმა ასე  გამოვარდება ხოლმე. 

ჰოდა, მისცესო. მანამდე კიდევ  მოურინიუ გაზეთებმა  გატანჯეს და მანაც მრისხანედ და ჩვეული მედიდურობით შეახსენა  მედიას, ვინ იყო და  რა გაეკეთებინა. ძველი „განსაკუთრებული ვინმე ვარო“ აღარ გაუმეორებია, მაგრამ  ამ განსაკუთრებულობის არსი კი გაშალა, მეტჯერ ვარ პრემიერლიგის ჩემპიონი, ვიდრე პრემიერლიგის დარჩენილი ცხრამეტი მენეჯერი ერთადო, და პრესკონფერენციიდან გამავალმა  სამგზის მოითხოვა პატივისცემა: „რესფექთ, რესფექთ, რესფექთ.“ 
 ამას მოჰყვა მეორე პრესკონფერენცია, უკვე  ბარნლისთან  თამაშის წინა დღეს, სადაც მოურინიუმ კვლავ შეახსენა შეკრებილებს, რომ ერთადერთი კაცია მსოფლიოში, ვისაც  ინგლისში, ესპანეთსა და იტალიაში მოუგია  ჩემპიონობა და რომ მანჩესტერის შარშან მეორე ადგილზე გასვლა საერთოდაც  დიდი გმირობა და მისი ერთ-ერთი დიდი სამწვრთნელო მიღწევა იყო ცხოვრებაში, შარშანწინ ევროპის ლიგის მოგება კი გუნდის იმდროინდელ დონეს შეესაბამებოდა და  რომ საერთოდ, მანჩესტერი ბოლო ინგლისური გუნდია, რომელსაც ევროპაში რამე მოუგია. მოკლედ, მოურინიუმ თავი დაიცვა და თან მეორე დღეს მოიგო კიდეც.

რა თქმა უნდა ეს ამბავი გუნდის ზედიზედ ორ წაგებას მოჰყვა, განსაკუთრებით კი ტოტენჰემთან შინ 0-3ზე  განადგურებას. თანაც, ჟოზეს ასეთი ანგარიშით  საშინაო თამაში აქამდე არასდროს წაეგო. ჰოდა, შედგნენ. 
 აქ კი წამოიჭრა  მანჩესტერის ვიცე თავმჯდომარის ედ ვუდვორდის საკითხიც, რომელმაც, როგორც ამბობენ, მოურინიუს  სატრანსფერო გეგმები არ გაუნაღდა და საერთოდაც, მასთან წინააღმდეგობაშია. მენეჯერმა ეს წინააღმდეგობა, ამ ხმაურიან პრესკონფერნციებზევე უარყო, თუმცა ვინ დაიჯერებს, რომ არაფერი ყოფილა. ფანებმა  ხარჯით გამოხატეს ვიცე-თავმჯდომარისადმი დამოკიდებულება: ბარნლის ტარფ მურის მინდორს თამაშის დაწყებამდე ცოტა ხნით ადრე  დაკვეთილმა  აეროპლანმა გადაუფირნა, რომელსაც  ჩაბმული ჰქონდა პლაკატი წარწერით: „ედ ვუდვორდი. წარუმატებლობის  სპეციალისტი“.

თავად ჟოზემ გასულ კვირაშიც გაგვაფრთხილა, ჩემი სიდიადე იმაზე არაა  დამოკიდებული  გახდება თუ არა  წლეულს ჩემპიონი მანჩესტერ იუნაიტედიო. მე უამისოდაც, ისა ვარ,  რაცა ვარ და თქვენი ნაწერები ამას ვერ შეცვლისო. ინტრიგა რომ მეტი ყოფილიყო, გვარდიოლასაც კითხეს, აბა, რას იტყვით, მოურინიუს გარშემო ატეხილ ამბავზე და მედია-დაწოლაზეო. ისიც კიდე იმის ჩიტი იყო, სხვის ამბავზე ელაპარაკა: ჩვენი ხელობა  ასეა, ვიგებთ გვაქებენ, ვაგებთ გვადანაშაულებენ. არაა იოლი ამბავი, მაგრამ ასე ავირჩიეთო.

აქ საინტერესო სხვა  არის: რამდენ ხანს დარჩება მოურინიუ ოლდ ტრაფორდზე. ფერგიუსონის წასვლის შემდეგ უკვე მესამედ მიმდინარეობს გუნდის შენება და იქაურობა უმეტესად არც წყალია და არც ღვინო. 
თავად ფერგი კი მოჯანიანდა სისხლის ჩაქცევის შემდეგ, ორი წუთით საკლუბო ტელევიზიითაც  გამოაჩინეს სეზონის გახსნისას. ბაღში იჯდა და ბიჭებს წარმატებას უსურვებდა. 
ვაჰ, დრონი, დრონი. 




მატჩის შემდეგ კი ვლადიმერ პუტინი საპატიო წრეს ურტყამდა და მაყურებელს ესალმებოდა, რა დროსაც ყინულზე დაგებულ წითელ ხალიჩას ფეხი წამოკრა და თავქვე დაემხო.