ჰალე უპატრონოდ დარჩა

Gerry Weber-მა  120 მაღაზია დახურა

ტურში, ერთ-ერთი პრესტიჟული საჩოგბურთო ტურნირი მთავარი სპონსორის გარეშე დარჩა. გერმანიის ქალაქ ჰალეში ივნისის თვეში საჩოგბურთო ვარსკვლავები ჩასვლას ნამდვილად არ თაკილობენ. ის კი არა, აღნიშნული შეჯიბრი როჯერ ფედერერისთვის უსაყვარლესი ტურნირია. თავად განსაჯეთ - იქ მას ცხრაჯერ უჩემპიონია, ხოლო შარშან ფინალი ბორნა ჩორიჩთან დათმო.

 

წლეულს კი ჰალეს ტურნირი უპატრონოდ დარჩა. მთავარ სპონსორს - კომპანია Gerry Weber-ს ტურნირის დაფინანსებაზე იძულებით უარის თქმა მოუხდა, რადგან ლიკვიდაციის პროცესშია და რამდენიმე დღის წინ 120 მაღაზიის დახურვის შესახებ გამოაცხადა. ვინც არ იცის ვეტყვით, რომ Gerry Weber-ი ტანსაცმლის მწარმოებელი მსხვილი კომპანია გახლდათ.

 

Gerry Weber-ს ჰალეს ტურნირის სპონსორობა ყოველწლიურად 4,7 მილიონი დოლარი უჯდებოდა. ტურნირის დირექტორმა რალფ ვებერმა სინანულით აღნიშნა, რომ შეჯიბრს ახალი სპონსორის ძებნა მოუწევს და იმედოვნებს, რომ ეს რაც შეიძლება მალე მოხდება.