ცივი შხაპი ნოემბრის სიცივეში

არ იყო კომბინაციური თამაში. არა მწვავე პასი. ისევ ბურთის თრევა, რასაც აზერბაიჯანელები იოლად უმკლავდებოდნენ.

მოულოდნელი და დასანანი მარცხი იყო. საქართველოს 19-წლამდელთა ნაკრებმა ლიხტენშტაინთან 7:0 მოგების მერე, ევროშესარჩევში 1:2 წააგო აზერბაიჯანთან და ახლა ისრაელთან მოგება ესაჭიროება ჯგუფიდან გასასვლელად. გამარჯვების შემთხვევაში, საქართველო გავა. ასევე გავა ისრაელიც. 

აი, ფრის შემთხვევაში კი თითქმის ნულია შანსი. არავინ დაიჯეროს, რომ აზერბაიჯანი ბოლო ტურში ლიხტენშტაინთან წააგებს. 
მოკლედ, გიორგი მიქაძის გუნდმა საქმე გაირთულა. არადა, პირველი ტაიმი ლევან ხარაბაძის შორიდან გასროლილით მოიგო. ეს ტაიმის ბოლო წუთზე მოხდა. ქართველებს მცირე სათამაშო უპირატესობა ჰქონდათ, თუმცა ჩანდა, რომ პრობლემები იყო მოედნის ცენტრში და ასევე, მარცხენა ფლანგზე, სადაც ბაირამოვი ბაირამობდა...

მეორე ტაიმში აშკარად გაუარესდა საქმე. ნახევარდაცვასა და თავდასხმას შორის დიდი ნაპრალი იყო, ცენტრში აზერბაიჯანი გაბატონდა და თამაში მოიშალა. ცენტრში რიცხობრივადაც ვაგებდით. 
მიუხედავად იმისა, რომ აზერბაიჯანელთა ორივე გოლი ჩვენების შეცდომებს მოჰყვა (ჯერ ლევან ხარაბაძე, მერე მეკარე დემეტრე ბულისკერია), თამაშიდან გამომდინარე, ალოგიკური ნამდვილად არ ყოფილა ეს გოლები. აზერბაიჯანმა საქართველო თამაშითაც დაჩაგრა.   

არ იყო კომბინაციური თამაში. არა მწვავე პასი. ისევ ბურთის თრევა, რასაც აზერბაიჯანელები იოლად უმკლავდებოდნენ.
ნებისმიერი გადამთიელი სპეციალისტი, აქ ვინც ჩამოდის, ხვდება, რომ რაღაც სხვა ფეხბურთს ვთამაშობთ - არაგუნდურს, არარაციონალურს. ამასწინათ თბილისის დინამოს უკრაინელმა ფიზმომზადების სპეციალისტმაც გვითხრა ინტერვიუში. ადრეც, რომელი ერთი ჩამოვთვალოთ?!