ბრიტანეთის დედაქალაქ ლონდონში სტარტი აიღო როდ ლეივერის თასის გათამაშებამ. ტურნირზე ტრადიციულად ერთმანეთს ევროპის და მსოფლიოს ნაკრებები ხვდებიან.

პირველ სათამაშო დღეს მოგებული მატჩი 1 ქულად ფასობს, მეორე დღეს 2 ქულად, ხოლო დასკვნით მესამე დღეს – 3 ქულად.

ტურნირი კასპერ რუუდის და ჯეკ სოკის დაპირისპირებით გაიხსნა. ფავორიტად ნორვეგიელი ჩოგბურთელი მიიჩნეოდა, რომელიც მსოფლიო რეიტინგის მეორე ჩოგანია, ხოლო მისი მეტოქე 128-ე.

null

შეხვედრის სტარტი კასპერს უკეთესი გამოუვიდა – მან ადრეული ბრეიკი შეასრულა და მალევე ორგეიმიანი უპირატესობით დაწინაურდა 2:0. რუუდი მეცხრე გეიმამდე წარმატებით ინარჩუნებდა მოპოვებულ ჰანდიკაპს, თუმცა სოკი გააქტიურდა და მოულოდნელად უკუბრეიკი შეასრულა 4:5.

ნორვეგიელი ჩოგბურთელი დროულად გამოფხიზლდა – ბრეიკს უკუბრეიკით უპასუხა და პირველი სეტი მაინც გამარჯვებით დაასრულა 6:4.

მეორე პარტიაში ორივე ჩოგბურთელი ძალინ დამაჯერებლი იყო საკუთარ ჩაწოდებაზე და თითქოს ტაიბრეიკი გარდაუვალი გახლდათ, თუმცა მე-11 გეიმში ამერიკელმა მეტოქის ჩაწოდება მშრალი ანგარიშით მოიგო, შემდეგ კი წარმატებით ჩააწოდა სეტზე 1-1 (4:6 7:5).

მესამე გადამწყვეტ სეტში სუპერ ტაიბრეიკი შედგა, სადაც რუუდის უპირატესობა გამოიკვეთა – კასპერი ჯერ 3:0 იგებდა, შემდეგ 7:4-ს, საბოლოოდ კი 10:7 იმარჯვა და ევროპას პირველი ქულა მოუტანა 1:0.

მეორე შეხვედრაში სტეფანოს ციციპასი დიეგო შვარცმანს დაუპირისპირდა. მიუხედავად დამაინტრიგებელი აფიშისა, ბრძოლა ფაქტიურად არ შედგა – ბერძენმა 77 წუთში გაანადგურა მეტოქე ანგარიშით 6:2 6:1.

არგენტინელ ჩოგბურთელს კარიერაში სერიოზული ჩავარდნა აქვს და ეს დღევანდელმა მატჩმაც გამოაჩინა – დიეგომ მთელი შეხვედრის განმავლობაში ერთადერთი ეისი ჩააწოდა და 2 ორმაგი შეცდომა დაუშვა, საკუთრი ჩაწოდება ხუთჯერ დათმო და ერთი უკუბრეიკი შეასრულა.

null

ბერძენმა მატჩი 17 ვინერსით და 6 უნებლიე შეცდომით დახურა, ხოლო არგენტინელს უარყოფითი ბალანსი ქონდა – 7 ვინერსი და 12 უნებლიე შეცდომა.

ევროპელები ანგარიშში 2:0 დაწინაურდნენ.

უაღრესად საინტერესო და დაძაბული გამოდგა მატჩი ენდი მარეის და ალექს დე მინორს შორის. სტარტზე ბრიტანელმა ჩოგბურთელმა დაკარგა საკუთარი ჩაწოდება და 0:2 ჩამორჩა, თუმცა პროცესში 2 უკუბრეიკი შეასრულა და პირველი სეტი 7:5 მოიგო.

მეორე პარტიაში უკვე ავსტრალიელი დომინირებდა, რომელმაც მესამე და მეცხრე გეიმებში მოიგო გეიმები მეტოქის ჩაწოდებაზე და პარტიებს შორის ანგარიში გაათანაბრა 1-1.

სუპერ ტაიბრეიკზე გადამწყვეტი ახალგაზრდული ასაკი და უკეთესი ფიზიკური მომზადება იყო უპირატესი. 22 წლის ავსტრალიელმა თავისზე 13 წლით უფროსს მეტოქეს გადამწყვეტი სეტი 10:7 მოუგო და მსოფლიო ნაკრებს პირველი ქულაც მოუტანა – 5:7 6:3 10-7.

null

დღის დასკვნითი შეხვედრა ყველაზე საინტერესო და დამაინტრიგებელი გახლდათ – ფედერერ/ნადალის წყვილი სოკი/ტიაფოს ამერიკული ტანდემის წინააღმდეგ.

ევროპულმა სუპერ დუეტმა მატჩი შესანიშნავად დაიწყო და მეათე გეიმში შესრულებული ბრეიკით პირველი სეტი 6:4 მოიგო.

null

მეორე პარტიის სტარტზე უკვე სოკი/ტიაფოს ტანდემი გავიდა წინ ანგარიშში 3:1, თუმცა როჯერმა და რაფაელმა მალე ამოქაჩეს ჩამორჩენა და წონასწორობაც აღადგინეს 3:3.

სეტის ბედი ტაიბრეიკზე გადაწყდა, სადაც ამერიკელებმა ულაპარაკოდ აჯობეს მეტოქეებს და 7:2 იმარჯვეს.

მესამე გადამწყვეტი სეტი – სუპერ ტაიბრეიკი გახლდათ (ტაიბრეიკის მოსაგებად 10 ქულაა საჭირო). “საჩოგბურთო ლატარეა” გარდამავალი უპირატესობით მიმდინარეობდა – 9:8-ზე ევროპულმა დუეტმა მატჩპოინტიც მოიპოვა, თუმცა ამ შანსის გამოყენება ვერ შეძლო და ამისთვის დაისაჯა.

სოკი/ტიაფოს შეთამაშებულმა წყვილმა გადამწყვეტ მომენტში ზედიზედ 3 ქულა “აიღო” და მატჩიც მოიგო 4:6 7:6 11:9.

პირველი სათამაშო დღის შემდეგ ევროპის და მსოფლიო ნაკრებებს შორის ანგარიში თანაბარია 2:2.

ეს გახლდათ 41 წლის როჯერ ფედერერის კარიერის უკანასკნელი მატჩი. დიდმა საჩოგბურთო მაესტრომ დაასრულა პროფესიონალური კარიერა და ამიერიდან ვეტერანის სტატუსს მოირგებს.

როჯერმა კარიერის განმავლობაში 20 დიდი სლემის ტურნირი მოიგო.

ფედერერმა კარიერა ATP-ის 103 ტიტულით დაასრულა.

შვეიცარიელი ჩოგბურთელი 310 კვირის განმავლობაში ლიდერობდა რეიტინგს.

სანაკრებო დონეზე როჯერმა მოიგო დევისის თასი და ოლიმპიური ოქრო (2008 წელს წყვილში სტენ ვავრინკასთან ერთად).

null

სპორტშოუ