2023 წლის საკალათბურთო მსოფლიოს ჩემპიონატის შესარჩევ მატჩში საქართველოს ნაკრებმა ახალ სპორტის სასახლეში პირველი ოფიციალური მატჩი გამართა და მოქმედი მსოფლიოს ჩემპიონი – ესპანეთის უძლიერესი ნაკრები დაამარცხა.

null
საქართველოს ნაკრები ესპანეთთან დაპირისპირებას დიდი დანაკლისით შეხვდა – სხვადასხვა მიზეზების გამო გვაკლდა 3 წამყვანი მოთამაშე: გოგა ბითაძე (მუხლის ტრავმა), სანდრო მამუკელაშვილი (NBA-ს ზაფხულის ლიგას თამაშობს) და გიორგი ცინცაძე (ფეხის ტრავმა).

დანაკლისი ქონდა ესპანეთის ნაკრებსაც – მთავარი მწვრთნელის – სერჟიო სკარიოლოს გადაწყვეტილებით შემადგენლობაში არ იყო არცერთი კლათბურთელი NBA-ში და ევროლიგაზე მოასპარეზე კლუბებიდან (დასვენების საშუალება მისცეს).

საქართველოს ნაკრების მთავარმა მწვრთნელმა – ილიას ზუროსმა ასეთი სასტარტო ხუთეული დააყენა: რატი ანდრონიკაშვილი, თად მაკფადენი, დუდა სანაძე, თორნიკე შენგელია და გიორგი შერმადინი. მეტოქის ხუთეული კი ასე გამოიყურებოდა – კოლომი, გერა, ლოპეს-აროსტეგი, პარა, პრადილა.

null

მატჩის სტარტზე პირველი შედეგიანი ტყორცნა დუდა სანაძის ანგარიშზე იყო – საქართველოს ნაკრების სნაიპერი წამიერად დატოვეს მარტო პერიმეტრზე და მანაც ზუსტად გაისროლა 3:0.

მოქმედი მსოფლიო ჩემპიონები დროულად გამოფხიზლდნენ – ლოპეს-აროსტეგის ზუსტი სროლების ფონზე ჯერ ანგარიში გაათანაბრეს, ჯამში კი 9:0 გაქცევა მოაწყვეს და 9:3 დაწინაურდნენ.

მასპინძლები მალევე მოეგნენ გონს – ჯერ მაკფადენმა ჩააგდო შორიდან, რასაც 3 წამიან ზონაში შერმადინის და შენგელიას აგრესიული შესვლები მოყვა.

მშვენივრად შემოვიდა სათადარიგოთა სკამიდან ბექა ბექაური, რომელმაც ჯერ მეტოქე დააბლოკშოტა, რასაც შეტევაში ორი მოხსნაც მიაყოლა.

null

თანაბარ ბრძოლაში მილეული მეოთხედის უკანასკნელ წამებზე ბექაურმა თამამად “შეაღო” სამწამიანი ზონის კარი და იდეალურად შესრულებული ლეიაფით პირველი მეოთხედი მასპინძლებს მოაგებინა 15-14.

მეორე პერიოდში საქართველოს ნაკრებმა მცირე სათამაშო უპირატესობა მოიპოვა და 5-8 ქულიან ლიდერობას ინარჩუნებდა. ილიას ზუროსის გაწვრთნილი კალათბურთელები საკმაოდ მწყობრად მოქმედებდნენ როგორც შეტევაში, ასევე დაცვაში. გუნდური კალათბურთის დემონსტირებაც საკმაოდ მაღალ დონეზე ხდებოდა, რისი წყალობითაც საქართველომ პირველი ტაიმი 37:31 მოიგო.

null

მეორე ტაიმის სტარტზე გიორგი შერმადინი “შერმინატორად” გარდაიქმნა – ზედიზედ 4 ქულა აიღო და დაცვაშიც სისხლი გაუშრო მეტოქეს – დომინანტურად დაუფარა ჯერ ბასასის, შემდეგ ხაიმე ფერნანდესს.

41:36-ზე საქართველოს ნაკრებმა ბურთი ჩაჭრა და კონტრშეტევაზე გადავიდა. 4 ერთზე გავედით, თუმცა უმარტივესი სიტუაციიდან თოკო შენგელიამ ვერ ჩატენა, საპასუხო შეტევაში კი არასპორტული ჯარიმა დავიმსახურეთ და მასპინძელთა უპირატესობაც მალევე ჩამოდნა 41:41.

მეოთხედის ბოლოს საქართველოს ნაკრები ცოტა “აირია” – თად მაკფადენმა რამდენჯერმე დაკარგა ბურთი და ესპანეთი გალიდერდა 47:44.

უკანასკნელ 5 წამში ბექაურმა ორჯერ დააფარა ესპანელ კალათბურთელებს და სირენის ხმაც გაისმა. მესამე პერიოდში საქართველოს ნაკრებმა მხოლოდ 7 ქულა ჩააგდო, საკუთარ კალათში კი 16 მიიღო.

null

მეოთხე მეოთხედის პირველ ნახევარში ესპანეთი ინარჩუნებდა 4 ქულიან უპირატესობას, თუმცა ჯერ მაკფადენმა ჩააგდო ენდ ვანი, რასაც თოკოს 2 ქულიანი მოყვა და საქართველო გალიდერდა 65:64.

ძირითადი დროის დასრულებამდე 33 წამით ადრე რატი ანდრონიკაშვილმა ბასასს ბურთი მოპარა და მასპინძელთა უპირატესობა 3 ქულამდე გაზარდა 67:64.

საფინალო სირენამდე 18 წამით ადრე, ბრიზუელამ ურთულესი პოზიციიდან “მკვლელი” სამქულიანი გაისროლა და წონასწორობა აღადგინა 67:67. ბოლო შეტევაში თოკომ ესროლა, თუმცა ვერ ჩააგდო და შეხვედრა ოვერტაიმში გადავიდა.

null

დამატებით ხუთწუთეულში ანგარიში გერამ გახსნა, ჩააგდო რა 2 ქულიანი, რასაც ანდრონიკაშვილის 3 ქულიანი მოყვა პასუხად. გერამ ისევ დაუბრუნა ლიდერობა ესპანეთს, რასაც შერმადინის ორი ზუსტი საჯარიმო მივაყოლეთ.

რატი ანდრონიკაშვილმა მიზანი გაისწორა – ზედიზედ 5 ქულა მიითვალა და საქართველო 77:73 გალიდერდა, სათამაშო დრო კი სუფთად 2 წუთი რჩებოდა ტაბლოზე.

ესპანელებმა ბევრი წვალების შედეგად 1 ქულამდე შეამცირეს ჩამორჩენა, თუმცა თად მაკფადენმა მკვლელი სამქულიანი გაისროლა და 16 წამით ადრე ანგარიში 80:76 გახადა.

ესპანელების მიერ აღებულმა ტაქტიკურმა ჯარიმამ არ გაამართლა – მაკფადენმა ორივე საჯარიმო ჩააგდო და საქართველომ საბოლოო გამარჯვება მოიპოვა 82-76.

საქართველოს საკალათბურთო ნაკრებმა ისტორიული გამარჯვება მოიპოვა ქართული სპორტის ისტორიაში – დაამარცხა მოქმედი მსოფლიოს ჩემპიონი ესპანეთის ნაკრები.

მატჩის საუკეთესო მოთამაშე საქართველოს ნაკრების გამთამაშებელი – რატი ანდრონიკაშვილი გახდა, რომლის ანგარიშზეც 17 ქულა იყო, 18 ქულა ქონდა გიორგი შერმადინს, 16 თად მაკფადენს. ტრადიციულად აქტიური იყო საქართველოს ნაკრების კაპიტანი თოკო შენგელია, რომელსაც 3 პასი დააკლდა სამმაგ დუბლამდე – 12 ქულა, 10 მოხსნა, 7 პასი.

ესპანელთა რიგებში ხუთმა კალათბურთელმა დააგროვა 10 ან მეტი ქულა: ლოპეს-აროსტეგის 14 ქულა ქონდა, ბრიზუელას 12, 11 პარას, ხოლო ბასასიმ და გერამ 10-10 ჩააგდეს.

null

ესპანეთმა ჯგუფურ ეტაპზე პირველი მატჩი წააგო და მათი ბალანსი 4 მოგება და 1 მარცხია, საქართველოს ნაკრებმა კი 6 გამართული ტურის შემდეგ 4 მოგება და 2 წაგება დააგროვა, რაც სრულიად საკმარისი გახლავთ მეორე ჯგუფურ ეტაპზე გასასვლელად.

უკრაინამ გუშინ სტუმრად მოიგო ჩრდილოეთ მაკედონიასთან 73:68, ჯგუფურ ეტაპზე 3 მოგება და 2 წაგება დააგროვა და მესამე ადგილს იკავებს.

ზეგ, რიგაში, უკრაინა ესპანეთს უმასპინძლებს და G ჯგუფიც ამით დასრულდება. საქართველო, ესპანეთი და უკრაინა მომდევნო ეტაპზე გააგრძელებენ ბრძოლას, ჩრდილოეთ მაკედონიისთვის კი მსოფლიო ჩემპიონატისთვის ბრძოლა დასრულებულია, რადგან მათ 6-დან 6 შეხვედრა წააგეს და ჯგუფში ბოლო ადგილი დაიკავეს,

null

საქართველო – ესპანეთი 82-76 (15-14, 22:17, 7:16, 23:20, 15:9)

საქართველო: ანდრონიკაშვილი (17), მაკფადენი (16), სანაძე (8), შენგელია (12+10 მოხსნა+7 პასი), შერმადინი (18); ბექაური (5+4 მოხსნა+4 დაფარება), ბურჯანაძე (3), ჯინჭარაძე (3), ბაქრაძე;

ესპანეთი: კოლომი(0 ქულა+5 პასი), გერა(10+9 მოხსნა), ლოპეს-აროსტეგი(14+6 მოხსნა), პარა(11+6 მოხსნა), პრადილა(6+7 მოხსნა);ბრიზუელა (12), ბასასი (10), დიეზი (4), საიზი (4), ფერნანდესი (3), სიმა (2), ბარეირო (0).

ბენჟამინ ბონზი